Taimtim mung
binulung abang makasiklod ka "Kanakung Ginung Diyos, kanaku paramdam ka"
Kaybat banayad yang migtiririt ing maya
Dimdam mu ing kangye, kanta ning ayup bale 'ala!
"Ginu,
pakibatan mu ku" amung ginulisak
kinalabug ing duldul,, kildap babo mengaspak
mabilis ginulis kislap king bigang busilak
ginalgal na'ing gabun, balugbug mu mengaklak!
paligid
linawe mu, king babo angga lalam
"Ginu, pakit ka kanaku" amanu mung malam
masalang batwin linto ya libutad dalumdum
mata mung mulagat, bulag pa rin ing panamdam!
Alang milyari
ginulisak kang pasibayu
"Ginu, obat e ka palto metung a milagru?"
kiyak ning bayung bait, kinalat meto yatu
tudtud mung malakak melaklak ing kiyak rugu!
Inawad me ngeni
ing kekang tauling pangadi
"Tagkilan mu ku Ginu, sipingnan mu ku ngeni"
Binye na ing nawad mu, ya na pin ing milyari
Mariposang digpa king salu belisa me'iti!
nombresin
My e-mail addresses:
nombresin@digitelone.com
nombresin_ph@yahoo.com
Visit my Poetry in
English website:
https://www.angelfire.com/poetry/nombresin/index.htm
|
