antimong metung
unus mibugnus
binulus ning signus
bigla kung mebasa
libutad ning bagyung
ala namang uran.
antimunamang
gapus mepupus
kinusad mikabyus
bigla kung merimla
libutad ning aspak
ning mapaling abak.
e ku balu nung bakit
dinugpa yang bigla’t pilit
ing lub mung mabayat
king karinan kung payat.
obat ing langib ning
napun
e ne man mebaklas
e ne man megamus
sinagiwa yang pasibayu?
dapot balu ku balu mu
mapilang tuktuk king pasbul
e sapat mibuklat kekang pilubluban
makanyan mu naman
kasakmal butil buhangin
e makatalakad kastilyung paninap
antimurin balu ku balu mu
patak ning danum a karamput
e katmung metung dayat malat.
ngening makanyan kaselan
ing kekatang kabilyan
matiyaga kung pibabatan
manalangin kung manyawad
king kekang patawad!